વધૂની ઠઠ્ઠા મશ્કરી કરવી, વરરાજાને 5 લાખ રૂપિયામાં પડી.
લગ્ન પ્રસંગે ઠઠ્ઠા મશ્કરી તો ચાલતી જ રહેતી હોય છે. પણ લગ્નમાં અકારણ મઝાક મસ્તી કરનારા લોકો ચેતી જજો. નહીં તો ક્યાંક આ ઘટનાની જેમ તમારેય ઉલમાંથી ચૂલમાં ના પડી જવાય.
ગાઝિયાબાદમાં આવેલા સાહિબાબાદમાં એવી તો વિચિત્ર ઘટના બની કે લગ્નમાં મશ્કરી કરનાર લોકો આ વાત સાંભળીને મોઢા પર આંગળી જ મૂકી દેશે. અહીં એક લગ્નમાં નવવધૂની મજાક સાસરીપક્ષને એટલી મોંધી પડી કે પૂછો ના વાત. લગ્ન તો ફોક ગયા જ ઉલટાની માનહાની માટે વરરાજાએ વધૂને 5 લાખ રૂપિયા પણ આપવા પડ્યા.
ગાઝિયાબાદના હિડન બ્રિજ પાસેના ફાર્મહાઉસમાં શુક્રવારે એક લગ્ન દરમિયાન જ્યારે વર-વધૂ એક બીજાને વરમાળા પહેરાવતા હતા ત્યારે વરરાજાના મિત્રોએ વધૂને ઉચકી લીધી. જે બાબતે તરત જ નવવધૂએ પોતાનો અણગમો રજૂ કર્યો. પણ તેમ છતાં વરરાજાના મિત્રોએ તેને ફરી ઉચકી ત્યારે વધૂએ ગુસ્સામાં આવી આમ કરવાની ના કહીં. તેમ છતાં જ્યારે ત્રીજી વાર વધૂને વરરાજાના મિત્રો દ્વારા ઉચકવામાં આવી તો વહુરાણી આગ બબુલા થઇ ગઇ.
એટલું જ નહીં દુલ્હને વરમાળા સ્ટેજ પર ફેંકી દીધી અને વરરાજા જોડે લગ્ન કરવાની સ્પષ્ટ ના પાડી દીધી. ત્યારબાદ શનિવારે આ મામલે ગાઝિયાબાદ પોલિસ સ્ટેશનમાં કેસ નોંધાયો. જેમાં બન્ને પક્ષમાં જોરદાર વિવાદ થયો. નવવધૂએ વરરાજાના પક્ષથી 5 લાખ રૂપિયા વળતર પેટ માંગ્યા જે વરરાજાના પરિવારને આપવા પડ્યા.